பிரிட்ஜ்டவுண்: மேற்கு இந்தியத் தீவுகள் அணிக்கு எதிரான 2-வது டி20 கிரிக்கெட் போட்டியில் ஜாஸ் பட்லரின் அதிரடி காரணமாக இங்கிலாந்து அணி 7 விக்கெட்கள் வித்தியாசத்தில் வெற்றி பெற்றது.
பிரிட்ஜ்டவுணில் நேற்று அதிகாலை நடைபெற்ற இந்த ஆட்டத்தில் முதலில் பேட் செய்த மேற்கு இந்தியத் தீவுகள் அணி 20 ஓவர்களில் 8 விக்கெட்கள் இழப்புக்கு 158 ரன்கள் எடுத்தது. அதிகபட்சமாக கேப்டன் ரோவ்மன் பாவல் 43, ரோமரியோ ஷெப்பர்டு 22, நிக்கோலஸ் பூரன் 14 ரன்கள் சேர்த்தனர். இங்கிலாந்து அணி தரப்பில் சகீப் மஹ்மூத், லியாம் லிவிங்ஸ்டன், டான் மவுஸ்லி ஆகியோர் தலா 2 விக்கெட்களை வீழ்த்தினர்.
159 ரன்கள் இலக்குடன் பேட் செய்த இங்கிலாந்து அணி 14.5 ஓவர்களில் 3 விக்கெட்கள் இழப்புக்கு 161 ரன்கள் எடுத்து வெற்றி பெற்றது. கேப்டன் ஜாஸ் பட்லர் 45 பந்துகளில், 6 சிக்ஸர்கள், 8 பவுண்டரிகளுடன் 83 ரன்கள் விளாசினார். வில் ஜேக்ஸ் 38, லியாம் லிவிங்ஸ்டன் 23 ரன்கள் சேர்த்தனர். 7 விக்கெட்கள் வித்தியாசத்தில் வெற்றி பெற்ற இங்கிலந்து அணி 5 ஆட்டங்கள் கொண்ட டி 20 கிரிக்கெட் தொடரில் 2-0 என முன்னிலை வகிக்கிறது. முதல் டி20 ஆட்டத்தில் இங்கிலாந்து அணி 8 விக்கெட்கள் வித்தியாசத்தில் வெற்றி கண்டிருந்தது. 3-வது ஆட்டம் வரும் 15-ம் தேதி நடைபெறுகிறது.
