Wednesday, June 12, 2024
No menu items!
Google search engine
Homeவிளையாட்டு‘தொடர்ந்து 3 ஆட்டங்களில் வெற்றி பெற்றது உத்வேகம் அளிக்கிறது’ - ஆர்சிபி கேப்டன் டூ பிளெஸ்ஸிஸ்...

‘தொடர்ந்து 3 ஆட்டங்களில் வெற்றி பெற்றது உத்வேகம் அளிக்கிறது’ – ஆர்சிபி கேப்டன் டூ பிளெஸ்ஸிஸ் | Winning 3 games in a row is inspiring RCB captain du Plessis


பெங்களூரு: ஐபிஎல் கிரிக்கெட் லீக் போட்டியில் தொடர்ந்து 3 ஆட்டங்களில் வெற்றி பெற்றது உத்வேகம் அளிக்கிறது. இந்த மகிழ்ச்சியான தருணத்தை அடுத்த ஆட்டங்களுக்கும் கொண்டு செல்ல விரும்புகிறோம் என்று ராயல் சாலஞ்சர்ஸ் பெங்களூரு அணியின் கேப்டன் டூ பிளெஸ்ஸிஸ் தெரிவித்தார்.

குஜராத் டைட்டன்ஸ், ராயல் சாலஞ்சர்ஸ் பெங்களூரு அணிகளிடையிலான ஐபிஎல் டி20 லீக் ஆட்டம் நேற்று முன்தினம் இரவு 7.30 மணிக்கு பெங்களூரு சின்னசாமி மைதானத்தில் நடைபெற்றது.

இதில் முதலில் விளையாடிய குஜராத் அணி 19.3 ஓவர்களில் 147 ரன்களுக்கு ஆட்டமிழந்தது. ரித்திமான் சாஹா 1, ஷுப்மன் கில் 2, சாய் சுதர்ஷன் 5, ஷாருக் கான் 37, டேவிட் மில்லர் 30, ராகுல் டிவாட்டியா 35, ரஷித் கான் 18, மானவ் சுத்தர் 1, விஜய் சங்கர் 10 ரன்கள் எடுத்தனர்.

பெங்களூரு அணி தரப்பில் முகமது சிராஜ், யஷ் தயாள், விஜய்குமார் வைசாக் ஆகியோர் தலா 2 விக்கெட்களைக் கைப்பற்றினர். கரண் சர்மா, கேமரூன் கிரீன் ஆகியோர் தலா ஒரு விக்கெட்டை வீழ்த்தினர்.

பின்னர் 148 ரன்கள் எடுத்தால் வெற்றி என்ற இலக்குடன் விளையாடிய பெங்களூரு அணி 13.4 ஓவர்களில் 6 விக்கெட்கள் இழப்புக்கு 152 ரன்கள் எடுத்து வெற்றி பெற்றது. 38 பந்துகளை மீதம் வைத்து 4 விக்கெட்கள் வித்தியாசத்தில் பெங்களூரு அணி வெற்றி கண்டது.

தொடக்க வீரர்களாக களமிறங்கிய விராட் கோலியும், கேப்டன் டூ பிளெஸ்ஸிஸும் அதிரடியாக விளையாடி ரன்களைக் குவித்தனர். விராட் கோலி 27 பந்துகளில் 42 ரன்களும் (2 பவுண்டரி, 4 சிக்ஸர்கள்), டூ பிளெஸ்ஸிஸ் 23 பந்துகளில் 64 ரன்களும் (10 பவுண்டரி, 3 சிக்ஸர்கள்) குவித்து அணிக்கு அதிரடியான தொடக்கம் கொடுத்தனர்.

வில் ஜேக்ஸ் 1, ரஜத் பட்டிதார் 2, கிளென் மேக்ஸ்வெல் 4, கேமரூன் கிரீன் 1 ரன்களில் ஆட்டமிழந்தனர். இதனால் ஆட்டத்தில் பரபரப்பு ஏற்பட்டது.

இருந்தபோதும் வெற்றிக்குத் தேவையான ரன்களை தினேஷ் கார்த்திக்கும், ஸ்வப்னில் சிங்கும் எடுத்தனர். தினேஷ் கார்த்திக் 21 ரன்களும், ஸ்வப்னில் சிங் 15 ரன்களும் எடுத்து ஆட்டமிழக்காமல் இருந்தனர். பெங்களூரு அணி தொடர்ச்சியாக பெறும் 3-வது வெற்றி இதுவாகும்.

குஜராத் அணி தரப்பில் ஜோஷுவா லிட்டில் 4 விக்கெட்களைச் சாய்த்தார். நூர் அகமது 2 விக்கெட்களைக் கைப்பற்றினார்.

2 விக்கெட்களைக் கைப்பற்றிய முகமது சிராஜ் ஆட்டநாயகனாகத் தேர்வு செய்யப்பட்டார். பெங்களுரு அணி இதுவரை 11 ஆட்டங்களில் விளையாடி 4 வெற்றி, 7 தோல்விகளுடன் 8 புள்ளிகளைப் பெற்று பட்டியலில் 7-வது இடத்தில் உள்ளது. குஜராத் அணி அணி 11 ஆட்டங்களில் விளையாடி 4 வெற்றி, 7 தோல்விகளுடன் 8 புள்ளிகளைப் பெற்று பட்டியலில் 9-வது இடத்தில் உள்ளது.

வெற்றி குறித்து பெங்களூரு அணியின் கேப்டன் டூ பிளெஸ்ஸிஸ் கூறியதாவது: தொடர்ச்சியான தோல்விகளை பெற்றுக் கொண்டிருந்த நாங்கள் தற்போது ஹாட்ரிக் வெற்றியைப் பெற்றுள்ளோம். இது எங்கள் அணிக்கு மிகப்பெரிய உத்வேகமாக அமைந்துள்ளது.

இந்த தருணத்தை முன்னோக்கிக் கொண்டு செல்ல விரும்புகிறோம். இன்றைய ஆட்டத்தில் எங்கள் அணி வீரர்கள் சிறப்பாக விளையாடினர். நம்ப முடியாத செயல்திறனை அவர்கள் வழங்கினர். இதன்மூலம் எங்கள் அணியின் நம்பிக்கை வளர்ந்துள்ளது என்று நான் நினைக்கிறேன்.

தொடர்ச்சியாக 3 போட்டிகளில் வெற்றி பெற்றுள்ளது மிகவும் மகிழ்ச்சியான தருணமாக உள்ளது. கடுமையான போராட்டம், முயற்சியால் கடந்த 3 போட்டிகளில் வெற்றியைச் சுவைத்தோம்.

உறுதியுடன் விளையாடுவோம்: இதை நாங்கள் கொண்டாட வேண்டிய தருணத்தில் இருக்கிறோம். அடுத்த போட்டியில் இதே நம்பிக்கை, இதே உறுதியுடன் விளையாடுவோம்.

கடந்த 3 ஆட்டங்களிலும் பேட்டிங் மற்றும் பந்துவீச்சில் நாங்கள் சிறப்பாக இருந்ததாக உணர்கிறோம். களத்திலும், களத்துக்கு வெளியேயும் நாங்கள் ஒருங்கிணைந்து செயல்பட்டோம். இதனால் களத்தில் நம்பமுடியாத அளவுக்கு அபாரமான செயல்பாட்டை வெளிப்படுத்தினோம்.

இந்த ஆடுகளம் சற்று வித்தியாசமாக இருந்தது. மேலும் பந்துகள் நன்றாக எழும்பி வந்தன.

எந்தவொரு போட்டியிலும் 180 முதல் 190 ரன்கள் எடுக்கும்போது அது சவாலாக இருக்கும். இந்த ஆட்டத்தில் குறைந்த அளவு ரன் குவிப்பு இருந்தது. அதை நாங்கள் விரைவிலேயே எட்டினோம். அடுத்தடுத்து விக்கெட்களை இழந்தபோது சிறிது பதற்றம் இருந்தது. ஆனாலும் தினேஷ் கார்த்திக், ஸ்வப்னில் சிங் ஆகியோர் கடைசி நேரத்தில் நிதானத்துடன் விளையாடி வெற்றியைத் தேடித் தந்தனர். இவ்வாறு அவர் கூறினார்.



RELATED ARTICLES

LEAVE A REPLY

Please enter your comment!
Please enter your name here

- Advertisment -
Google search engine

Most Popular

Recent Comments